| Nutaarsiassat

Nutaarsiassat januar kvartal 2018

Ukioq 2017-ip ingerlasimaneranut kingumut qiviarneq kiisalu 2018-imi pisussat

Isumaqatigiinniarnernut tunngasut

AK-p iluani sulinermi akissaatit atukkallu pisortat suliffeqarfiinut atuuttut pillugit isumaqatigiissutit nutarterniarneri/isumaqatigiissutiginiarneri, Namminersorlutik Oqartussani isumaqatigiinniartarfimmi sulisukinneq peqqutaatinneqarluni, assut sivisunikuusut, tassami atuutilerfissaat 1. april 2015-imili immat,  maanna kiisami tamarluinnangajammik naammassineqarnikuupput taamaattorli annermik amigaataalluni ilinniarfeqarfinni sulisut sulinerannut najoqqutassatut nutaamik isumaqatigiissutissaq (arbejdstidsaftale). Taanna sulisut kattuffiinit marlunnit tassalu AK-mit, ASG-mit (ilinniagartuut kattuffiat) kiisalu Namminersorlutik Oqartussanit isumaqatigiissutigineqaruni atuutilertussaaniaraluarpoq taamaattorli suli isumaqatigiinniartunit suli atsioqatigiissutigineqanngilaq taamaattoqarneranullu peqqutaalluni ASG-mit AK-millumi taama siunnersuutigineqartutut isikkoqartillugu akuersaarneqarusunngimmat isumaqaramik maannamut isumaqatigiissummut atuuttumit ajorseriaateqassasoq. Maanna qisuariarnissaq tulleq Namminersorlutik Oqartussani isumaqatigiinniartarfimmiittoq utaqqineqarpoq, tassami AK-mit ASG-millu piumasarineqarnikuuvoq naapeqatigiinnikkut isumaqatigiinngissutit eqqartorlugit aaqqinniarneqarnissaat pissasoq kiisamilumi maanna kattuffiit suleqatigiittartut ataatsimoorussamik Namminersorlutik Oqartussanut qisuariaateqareernerisa kingorna 7. marts 2018 tassunga sulinermi najoqqutassamut isumaqatigiinniarnernut tunngatillugu AK ASG-lu aggersarneqarput. Neriunarporlu taassuma kingorna nikittoqarumaartoq isumaqatigiinnissaq anguniarlugu.

Isumaqatiginninniutigineqareertussaagaluartunut aamma ilaapput upalungaarsimanermut pisortat. Taakku isumaqatiginninniuttarnerat AK-mut 2016-imi ASG-p AK-llu akunnerminni killiliussamik isumaqatigiissuteqarneratigut utertinneqarsimavoq. Taamaattumillu AK-mit isumaqatigiinniunneqarnissaannut piumasaqarnermik AK Namminersorlutik Oqartussat isumaqatiginninniartarfianut piumasaqareernikuuvoq. Pineqartut akissaataat sulinermilu atugaat pillugit nutaamik isumaqatigiinniutigineqarnissaat AK-mit arlaleriarluni eqqaasitsissutigineqartareeraluartoq illua’ tungerisanit tamanna suli  naammassineqanngilaq.

Isumaqatigiissummut tassalu - inunnik isumaginninnermi  siunnersortinut inunnillu sullissisunut isumaqatigiissutip iluani tapimut nutaamut myndighedstillæg-imik taasamut tassalu aaliangiinerni suliaqartartunut soorlu assersuutigalugu meeqqat angerlasimaffiup avataanut inissinneqarnissaannik aaliangiisartunut il.il.tapeq assut persaqqutaasimavoq ingammillu AK-mut, naak isumaqatigiissummi qaqugukkut qanorlu ittunik suliaqartarnermi  tunniunneqartarnissaa ersarereeraluartoq sulisitsisut sulisullu assut nalornisimapput kikkunnut tunniunneqartassanersoq tamannalu nalornineq AK-mut annertuumik saaffiginnissutaallunilu akisussaaffiliutitinniarneqarsimagaluarpoq – tassa AK-mut nassuiaqquneqartarluni kikkut tassani taamaattumik tunineqassanersut tamannali AK-p akisussaaffiginagulu suliassarinngikkaa nassuiaatigineqartarpoq, tassami sulisitssisut sulisut kikkut qanoq ittunik suliaqarneri ilisimaarimmassuk taakku taama ittumik tapeqartinneqarnissaat isumagisussaammassuk. AK-p pisussaaffini tassani isumaqatigiissutit naammassinerisigut naammassereermagu sinneri sulisitsisup isumagisussaammagit.

Maanna myndighedstillæg-it agguaanniarnerinut sulisitsisut paatsuunganerat qaangeriartorneqalersoq takussutissaqartalerpoq – ingammillu tamassuma ajornartorsiutaanera kommunemi aaliangersimasumi atuussimasoq malunnarpoq taamatut tapeqartussat tuniorarneqalersimasut atorfeqarnerminni allagartaannut tapiliussanik takkuttoqartalermat – tamannalu assut qujanarpoq. Kommunini allani ajornartorsiutaannginnerusimasoq naatsorsuutigaarput – annertunerusumik taakkununnga tunngatillugu saaffiginnissutinik tigusaqarneq ajoratta. Soorngunami AK-mut ilaasortaq taama tapimik pisussatut inissisimasimasoriguni tunineqaranilu arlaatigulluunniit eqqunngitsumik pineqarsoriguni AK-mut suliassanngortitsisinnaavoq.

AK-p ataatsimeersuarsimanera sinniisunillu pikkorissartitsisimanera

2017-imi pisut kattuffimmut annersaattut taaneqarsinnaasoq tassalu kattuffiup september 2017 ataatsimeersuarnera, tamassumalu pinera iluatsillugu sinniisut sinerissamit sinniisoqarfiusunit ataatsimeersuarnermi AK-p malittarisassai malillugit peqataasut kiisalu Nuummi suliffeqarfinni sinniisuutitat sinniisuunerminni paasisimasassaannik pikkorissartinneqarsimapput. Ataatsimeersuarnermut tunngatillugu paasissutissat nutaarsiassani november 2017-imi saqqummersinneqartuni atuarneqarsinnaammat uani annertunerusumik eqqaaneqassanngilaq. Taassuma saniatigut ataatsimeersuarnermit imaqarniliaq AK-p nittartagaani atuarneqarsinnaavoq.

AK-p ukiunik 100-inngortorsiorsimanera

Atorfillit Kattuffiat 28. september 2017 piunermini ukiunik 100-junngortorsiorpoq. Ulloq taanna imaluunnit piffissami tassani AK sinniisunik pikkorissartitsillunilu ataatsimeersuarpoq taamaattumillu annertunerusumik nalliuttorsiutigineqarani. Taamaattormi ullorsiortut lagkageannik pillertoqarpoq pikkorissartullu/ataatsimeersuartullu Kofoedskole-meersunit nuanneqisumik erinarsorfigineqarlutik. Nalliuttorsiornissaq pinngikkallarmalli AK-mit nalliuttorsiornermut atatillugu arlaannik takussutissamik suliarinnittoqarnissaa – soorlu quppersagaliamik, takutitassiamik il.il. – anguniarlugu aperinnillattaartoqartaraluarpoq taamaattorli maannamut pisinnaasunik suli pissarsisoqanngilaq. 100-ileereeraluartoq kingusinnerusukkut taamatut allatulluunniit iliorluni nalliuttorsiutigineqarsinnaanera ammatinneqarpoq.

PFA Soraarneq – PFA Pension

Siusinnerusukkut nalunaarutigineqareersutut tassa PFA Soraarneq 1. januar 2018 atorunnaarsinneqarpoq. Taamaalillutillu AK-p isumaqatigiissutaanik tunngaveqartumik atorfeqartinneqartut, PFA Soraarnermullu pensioninik katersisut, katersaat PFA Pensionimut nuunneqarput. Taama nuunneqarnissaannut aaliangerneq pisimavoq AK-mut ilaasortaaqatigiit tungaanut piffissap sivisuup iluani AK-mit PFA Soraarnermillu allannguilerneq pillugu paasisitsiniaareernikkut. AK-p isumaqatigiissutaasigut PFA Soraarnermut pensioninut katersisut sinnerlugit ilaasortaaqatigiit katersat PFA Pensionimut nuunneqarnissaat tamarmiullutik akuersaarsimavaat.

PFA Soraarnerup atorunnaarnerani PFA Pensionimut nuunneqartut PFA Soraarnermiinnerminnitulli isikkoqartillugit – piumasaqatit tassani atuuttut atuutitillugit – aallaqqaammut nuunneqarput. 1. juli 2018 aallarnerfigalugu PFA Plus-imut nuunneqarsinnaanngussapput taamaalippallu periarfissat allat takkutissapput. Katersanut akiliutaasartut saniatigut immikkut akiliuteqanngikkaluarluni silimmasiinerit ilanngunneqassapput, tassani sillimasiinerit pineqartut tassapput navianartunik nappaateqalernermi (kritisk sygdom), toqunermi kiisalu ajoqusernikkut sulisinnaajunnaarnermi sillimmatit. Taakku sillimmatit aningaasartaat taama pisoqartillugu tunniunneqartartussat suli maanna aningaasartaasa annertussusissaat inissinneqanngillat taamaattorli 1.juli 2018 tikitsinnagu paasinarsissallutik. Taakku sillimmasiinerit aningaasartaat 0-imiit 500.000 kr.-init iluanni angissusilerneqarsinnaapput. Taakku saniatigut PFA Plus-imut nuunnermi katersisut ataasiakkaat nammineerlutik nemid atorlugu isernikkut katersatik takusinnaalertussaavaat allatullu iluarisaminnik inississornisssaannut aamma periarfissaqalissallutik. PFA Pensionip pilersaarutigivaa nunatsinni sullissisunik inissiinissaq – taakkunannga aamma kalaallisut oqaasilinnik sulisoqartussaalluni.

Kattuffimmi ukiup ingerlanerani suliarineqartartut

Ukiup ingerlanerani AK-mit suliarisartakkanut makku ilaasimapput: Piffissap annerpaartaa ilaasortanit saaffiginnissutinik suliaqarnernut atorneqarpoq.Isumaqatiginninniutissanik assigiinngitsunik isumaqatigiinniarnerit. Ilaasortaaqatigiinnut allanulluunniit aggersarneqarnermi orniguttarnerit ataatsimeeqateqartarnerillu. Kattuffeqatinik ataatsimeeqateqartarnerit suleqatigiittarnerillu. Inatsisartunut angorusutanik, soorlu inatsisinik aaliangersimasunik, pilersitseqquniarlugit allagaqarnerit. Inatsisartut ataatsimiititaliaannut sunniiniarsaraluni saqqummiinerit. Naalakkersuisunik ataasiakkaanik ataatsimeeqateqartarnerit – AK-p anguniagai pillugit. Politikkikkut partiinik ataatsimeeqateqartarnerit. Suliffeqarfinnik ataatsimeeqateqartarnerit. Ataatsimiititalianut assigiinngitsuni ataatsimiittarnerit. AK-p siulersuisuini ulluinnarnilu aqutsisuini ataatsimiittarnerit. Eqqartuussissuserisunik ataatsimeeqateqartarneri. Sullitat pillugit eqqartuussisoqartillugu najuuttarnerit. Ilaasortanik ataasiakkaanik kiisalu ilaasortaaqatigiiaanik ataatsimeeqateqartarnerit. Pisunut assigiinngitsunut aggersarneqarnermi orniguttarnerit: Oqalugiarnerit. Tusagassiutinik sammisaqarnerit. Ulluinnarnilu allaffissornermi suliat isumagineri allarpassuillu. 

Ukioq 2018-imi AK-mit pilersaarutit ilaat

Aappaagu 2019-imi AK-p pisortanut isumaqatigiissutaasa Namminersorlutik Oqartussanut isumaqatigiinniutigineqaqqinnissaannut piareersaatit maannangaaq ingerlanneqaqqileriissapput. Piffissami qaninnermi AK-mi ilaasortat AK-p isumaqatigiissutaanik atuisut allaffigineqassapput – sinniisuisigoorlugit – isumaqatigiinniarnissanut piumasaqaatinik/kissaatinik katerseqqullugit AK-mullu apuusseqqullugit. Taakku saniatigut soorngunami ilaasortat ataasiakkaat siunnersuuteqarnissaminnut AK-mut apuussinissaminnut aamma tikilluaqqusaapput.

September 2017 AK-p ataatsimeersuarnerani AK-p siulittaasuanit oqaatigineqarnikuuvoq ukiup matuma 2018-ip ingerlanerani illoqarfiit arlallit tikinneqarumaartut – tassani annermik eqqarsaatigineqarput illoqarfiit kommuninut qullersaqarfiusut kiisalu illoqarfiit AK-mit sinniisuuffigineqanngitsut. Angalanissat siunertarissavaat kommuninik suleqateqarluarnissaq sulisunullu tunngatillugu ajornartorsiutit pilersartut pinaveersaatinnissaannut suleqatigiilluarnissaq anguniarneqassalluni. Taassuma saniatigut ilaasortat pisariaqartittarmassuk qanimut oqaloqatigineqarnissartik assigiinngitsunik oqaloqatigiissuteqarluni soorlu kattuffeqarnermut, isumaqatigiissutinut, inatsisinut il.il.tunngasunik. Angalanissamut aamma siunertaavoq isumaqatiginninniarnissanut piumasaqaatinik katersinissaq. Illoqarfinni tikitani naatsorsuutigineqassaaq ilaasortat immaqalu aamma ilaasortanngorusuttunik ataatsimeeqateqartarnissat taakkununnga aamma pilersaarutinut ajornanngippat ilaatinniarneqarpoq maanna AK-p inatsisilerituut atortagaanneersumik sulisumik inatsisinik ilisimasalimmik peqataasoqarnissaa.

Ukioq manna 2018-imi isumaqatiginniunneqartussaapput politiit angallataanni naalakkat aquttullu aningaasarsiaat sulinermilu atugaannut tunngasut. Taakku Naalagaaffiup ataani atorfeqarput. Isumaqatigiinniarnissanut piumasaqaatit taakkununnga tunngasut isumaqatiginninniarnermi illua’tungerisassanut AK-mit apuunneqareernikuupput naatsorsuutigaarpullu piffissami ungasinngitsumi isumaqatigiinniarnerit aallartinneqassasut.

September 2017 AK-p ataatsimeersuarnerani aalingiunneqarpoq AK-p allaffeqarfiani sulisut ataatsimik tassalu inatsisilerituumik ilaneqassasut. Tamannalumi piviusunngortinniarlugu 2017 naanngitsoq aviisitigut niitartakkatigut inatsisilerituumik atorfinittussamik pissarsiortoqaraluarpoq taamaattorli qinnuteqartoqanngimmat iluatsinngitsoorluni. Taamatut ilinniagalinnik pissarsinissaq maanna ajornakusoortinneqarsimammat AK-miinnaanngitsoq AK allatut aaqqiigallartariaqarsimavoq – tassalu eqqartuussissuserisut suleqatigisartakkat annertunerusumik, ima paasillugu inatsisilerituunut suliakkiussat aamma taakkununnga, suliarisartaganngorlugit inatsisilerituutut suliassat taamatut akilerlugit.

Taamatut aaqqiisimanerup saniatigut maanna misissorneqarpoq AK-mi atorfinittussamik inatsisilerituutut ilinniarsimanngikkaluartumik taamaattorli ilaasortanik sullissisussamik pissarsiorsinnaanissaq.  

Taama sulisut amerlineqarnissaannik tunngaviuvoq ukiuni kingullerni ilaasortat 300-missaannik amerlisimanerat kiisalu suliakkiunneqartut amerlisimanerisa kingunerisaanik taama iliornissaq pisariaqalersimammat – sullissinerup ajorseriannginnissaa eqqarsaatigalugu.

 AK-mit siunertaavoq ukiut tamaasa sinniisunik pikkorissartitsisarnissaq – soorlu sinniisunik nutaaqartillugu kiisalu sinniisooreersut pisariaqartitsinerat naapertorlugu sinniisutut suliassamik qaqileqqittarnissaat nutaanillu malitassanik peqalersillugu ilisimalertarnissaat pillugit.

Maanna misissorneqarpoq tamakku piviusunngortinnissaannut qanoq isikkulerlugit kikkunnillu ingerlanneqartarnissaat.

  

Inussiarnersumik inuulluaqqusillunga

  

Dina Olsen

Atorfillit Kattuffianni siulittaasoq