| Nutaarsiassat

Ukiortaaq 2014

Atorfillit Kattuffianniit ilaasortat tamaasa ilaqutaallu ukiortaami pilluaqquagut. Ukioq 2014-i qanoq atugassaqarfiussanersoq nalugaluarlutigu isumalluarluta aallartipparput – neriulluta tamanut aammalu Atorfillit Kattuffiannut angusaqarfiulluarumaartoq.

Ukioq 2013 Atorfillit Kattuffiannut pisoqarfiusimaqaaq. Pingaarnersiuilluni taaneqarsinnaapput marts 2013 Atorfillit Kattuffiata ataatsimeersuarnerata kingorna nutaamik siulersuisoqalersimanera siulittaasoqalersimaneralu. Siulittaasup/siulersuisut nutaap/nutaat pingaartissimavaat Atorfillit Kattuffiata patajaallisarneqarnissaa – aningaasatigut ingerlanneqarnera, ilaasortaqassuseq sinniisoqarnerlu eqqarsaatigalugit. Taakku saniasigut Atorfillit Kattuffiata ingerlariaasiata nutarterneqarnissaa siunniunneqarsimavoq – tamassuma kingunerivaa allaffissornikkut pisariillisaanerit ingerlanneqarneri, inimik (ejerlejlighed) siulittaasup inigisartagassaanik pisisoqarpoq, allaffik attartugaq attartorunnaarlugu kattuffiup nammineq illuutaanut allaffik inissinneqarpoq, siulersuisut suleriaasiat allanngortinneqarpoq ukiuni qinigaaffiusuni tulliuttuni anguniagassanik siunniussisoqarpoq taakkulu tunngavigalugit siulersuisunut ilaasortat ataasiakkaat akisussaaffilersorneqarlutik kiisalu sinniisut piginnaasaasa siuarsarneqarnissaannut aqqutissiuineq aallartisarneqarpoq – siullermik Nuummiinnaagallartoq ukiulli tullianiit sinerissami sinniisut sammineqarnissaat pisinnaajumaartoq naatsorsuutigineqarsinnaavoq .

2014-imi isumaqatiginninniutassat.

31.marts 2014 politiit angallataanni naalakkat aquttullu akissarsiaasa sulinermilu atugaat pillugit isumaqatigiissutaasimasoq atorunnaartussaavoq, tassungalu atatillugu nutaamik isumatigiissuteqarnissaq - 1. april 2014-imiit atuutilertussamik - siunertaralugu naalagaaffimmut Atorfillit kattuffiat isumaqatiginninniassaaq. Massakkut isumaqatiginninniarnissamut piareersaatit ingerlanneqaleruttorput.

Atorfillit Kattuffiata nittartagaa.

Siusinnerusukkut nutaarsiassani ilanngunneqareersutut nittartakkap tamakkiisumik immersorneqannginnera sulilu paasineqanngitsumik ajoquteqarnera nalunaarutigereernikuuvoq nalunaarutigineqaraluarlunilu ukioq 2014-ip aallartippallaannginnerani immersorneqarlunilu ajuinnarpallu taarserneqarnissaa imaluunniit allanik sullissisunik atuilernissaq eqqarsaatigalugu nalilersoqqinneqassasoq. Nalunaarutigissavara taamatut iliornissap kinguaattooqqalaarnera uanilu qaammammi siulersuisut ataatsimiinnissaanni aatsaat nalilersoqqinneqassammat – tamassuma nalilersuinerup qanoq kinguneqarumaarnera kingusinnerusukkut ilanngunneqarumaarpoq.