Ukiotaami AK-miit eqqarsaatersuutit.
Naalakkersuisut siulittaasuata, borgmesterit partiinilu siulittaasut ukiortaami oqaaseqataat, innuttaasunut ajunngitsorpassuarnik anguniagaqartut tusaallugit atuarlugillu ajunngilluinnarput tapersersornarlutillu.
Taamaakkaluartoq qujaniuteqaraangamik pisortani sulisorpassuit, suliffeqarfinni namminersortuni sulisorpassuit mininneqartartut misigisimanartarpoq.
Kommunit allaffeqarfiini suliffeqarfiinilu allani sulisut, Namminersorlutik Oqartussat allafeqarfiini suliffeqarfiinilu allani sulisut suliffeqarfippassuarni namminersortuni sulisut tassaapput, nunatta motorersuanik ingerlatitsisut, taamaattumillu qujaniarfigisariaqartut.
Taakkua akileraarutinik akilersuinermikkut, utoqqalinersiutilinnut, siusinaarlutik pensionisialinnut, innuttaasunut ikiortarialinnut ikiorsiissutinut politikkikkullu anguniakkanut allarpassuarnut aningaasalersuisuuginnanngillat. Pingaartumik pisortani sulisut politikkerit allajangiiniarnerini tunngavissanik aamma suliaqarput, taakkua aalajangigaannik piviusunngortitsisartuullutik. Tamannaannarluunniit pissutigalugu, sulisut tamarmik ataqqillugit, isumaqatigiissutit malitassallu allat malillugit suliffimminni pineqartariaqarput.
Taamaakkaluartoq sulisut eqqunngitsumik pineqartutut misigisartut, tamannalu pissutigalugu suliassanngortitsisartut ikiliartunngillat akerlianilli amerliartorlutik. Tamaattoqarnera kattuffiit suliassanikkiartuinnarnerisa uppernarsarpaa. Suliassat sulisunut tunngasut eqqartuussivinnut aalajangiivigisassanngorlugit ingerlateqqinneqartartut aamma amerliartorput. Tamakkualu pissutigalugit kattuffiit inatsisilerituunut ukiumut aningaasat atortagaat malunnaatilimmik amerliartorput. Qularutissaanngitsumillu ineriartorneq taammaattoq Namminersorlutik Oqartussani kommuninilu atuuppoq.
Pineqartut katikkaani aningaasarpassuuppput, allarpassuarnut inuiaqatigiinnut iluaqutaanerusumik atorneqarsinnaagaluartut, saqitsaakkusunnersuaq qimallugu, suliassani sulisunut tunngasuni oqaloqatigiinneq suleqatigiinnerlu qinerneqartartuuppat.
Tupinnanngitsumik isumaqatigiinniartoqartillugu kattuffiit pisortallu isumaqatigiinniartartui illua-tungeriittussapput, tamanna avaqqunneqarsinnaanngilaq.
Suliassalli sulisunut tunngasut pineqartillugit, illua-tungeriikkaluarluta ataatsimik siunertaqarpugut, tassalu; sulisut tamarmik ataqqinnittumik, isumaqatigiissutit, inatsisit malitassallu allat malillugit pineqartussaanerat anguniartussaagaatsigu.
Taamaattumik suliassani taamaattuni aningaasanik sipaaruteqassagutta, siunissami saqitsaanneq pinnagu oqaloqatigiinnerli suleqatigiinnerlu qinissagivut pisariaqavippoq.
Tamassi ukiortaami pilluaritsi.
Ikinngutinnersumik inuulluaqqusillunga.
Erik Hammeken
Siulittaasoq