Nutaarsiassat januar 2012

Ukiutoqaq 2011 kattuffinni pisoqarfiusimaqisoq naavoq, ukiorlu nutaaq 2012 aamma pisoqarfiunissaa qularutissaanngitsoq aallartippoq. Tamassi ukiortaami pilluaritsi.

2012-imi isumaqatigiinniarnissat.

2012-ip ingerlanerani kattuffiit annerit Namminersorlutik Oqartussanut isumaqatigiinniartussaapput. Isumaqatigiinniarnerit oqitsuinnaanavianngitsut ilimagisariaqarpoq, kattuffiimmi 2011-mi isumaqatigiinniartut tamanna misigisimavaat. Taamaattumik AK-mi siulersuisut februari aallartilaarpat tikillutik ataatsimiissapput, isumaqatigiinniarnissaq piareersarlugu, ilaasortaniillu piumasaqaatit, siumungaaq katersorneqarsimasut tulleriinnilersorlugit. Naatsorsuutigineqarpoq ataatsimiinneq ulluni pingasuni ingerlanneqassasoq. Tamanna naammassippat AK isumaqatigiinniarnissamut piariissaq.

Juullilernerani aningaasarsisarnerup allangor-tinniarneqarnera.

Soorlu oktober 2011 Nutaarsiassani nalunaarutigineqartoq, kattuffiit Namminersorlutik Oqartussat 2011 aallartiffigalugu juulli sioqqullugu akissarsititsisarneq atorunnaarsinniarmassuk, suliassaq faglig voldgitimut suliassanngortippaat.

Tamanna pivoq novemberip aallartisimalaarnerani, suliassap illua-tungeriit inatsisilerituuminnut tunniummatigu. Ajoraluartumilli erniinaq paasinarsivoq, suliassaq decemberip ingerlanerani naammassineqarsinnaannitsoq.

Taamaattumik kattuffiinniit piumasarineqarpoq, suliassap naammassillugu suliarineqarsimalernissaata tungaanut, 2011-mi qangatuut julli sioqqullugu akissarsisoqassasoq.

Illua-tungeriit tamanna pillugu aalajangerput, isumaqatigiissuteqassallutik, imaalillugu; kattuffiit faglig voldgift taamaatissagaat, taarsiullugu 2011-mi decemberimi jullli sioqqullugu akissarsisoqassasoq. Siunissami qanoq pisoqartarnissaa isumaqatigiinniarnerni nalinginnaasuni piumasaqaatitut qaqinneqarsinnaassasoq.

Tamanullu nuannaarutaasumik taama inerneqarpoq.

Suliap killiffia: Suligasuartussatut ataatsimiitsitaliaq.

Oktober 2010 Nutaarsiassani ima ilanngussaqarpugut:

” Qaqortumi sinniisup siunnersutaa, kommunit kattussuunnerisa kingorna, sulisut ilaasa akisussaafiisa qaffanneri pillugit AK qanoq iliuuseqarsinnaanersoq, annertuumik oqaluuserineqaroq.

Gruppikkaarluni oqaluuserinerata kingorna, ataatsimeersuartut ima aalajangerput:

1.      AK ukiuni pingasuni tulliuttuni, tulliani ataatsimeersuarnissap tungaanut, ilaasortanut makkuninnga paasitsitsiniaalluni/qaammarsaalluni suliaqassaaq:

-           Atorfimmi suliassat allatorsimanissaannut illit suna pisinnaatitaaffigaajuk aamma pisussaafigaajuk.

-           Qanoq paasissaviuk qasoruloortutit, suliffinnilu tarnikkut avatangiisit ajortut.

-           Kommunit misissuiffigalugit, atorfigisami sulisunut tamanut suliassat suut suliassarititaassanersut allattorneqarsimanersut qulakkeerlugu pa-asiniarlugu.

2.      Sulisut AK-mut sinniisumullunniit qasoruloorneq imaluunniit tarniluuteqarneq pillugu saaffiginnittut siunnersorneqassapput, paasitinneqassallutillu taamaattut sulinermi ajoqqusernertut nalunaarutigineqassasut.

3.      AK kattuffinnik allanik sulisitsisullu kattuffiinik aaqqiissutaasinnaasut pillugit suleqatissarsiussaaq, ajornartorsiutillu samminiarneqarnera tamanut nalunaarutigalugu.

AK-p sulissutigissavaa, suliffeqarfinni sinniisuuneqarfiusinnaasuni tamani, sinniisuunernik peqalernissaq, taamaaliornikkut gruppini formandeqartarnerup siunertarineqartutut atuutilernissaa anguniarlugu.

Sulisut akornanni, suliffimmi tarnilunnartumik avatangiiseqarnermik AK pasitsaasaqaruni, tamannalu suliffeqarfimmi pisortanik isumaqatigiissuteqarnikkut oqaloqatigiinnikkulluunniit iluarsiivigineqarsinnaangippat, taava pisariaqaviffiatigut pissutsit tamaattut pillugit, Sullivinnik Nakkutillisoqarfimmut nalunaarusiortoqassaaq.

4.      AK-p nassuerutigaa, immikkoortuni ataasiakkaani grupppini siulittasoqannginnera, massakkut pissutsinut pisooqataasoq, taamaattumillu gruppini siulittasoqarluni ingerlariaaseq, siunertarineqartutut atuutileqqittariaqartoq, ilaatigut gruppini sulittaasut, atorfinni tamani suliassat allattorsimaffiisa suliarineqarsimanerinik qulakkeerinninnissamut suleqataasinnaanissaat anguniarlugu.

AK-p aamma Suleqatigiinnermut ataatsimiitsitaliat atuutilernissaat sulissutigissavaa, suliassanik ingerlatsinerup pimorrussinerusumik ingerlanneqalernissaa siunertaralugu.”

2010-p naanissaata tungaanut ataatsimiitsitaliaq marlussoriarluni ataatsimiippoq, suliassap qanoq ingerlanneqarnissaanik aalajangersaaviusunik. Tamatuma kingorna suliassaq allatseqarfimiit ingerlanneqalerpoq.

2011-mi februari aallartilaartoq, Kommuneqarfik Sermersooq-mi direktioni ataatsimeeqatigineqarpoq. Ataatsimeersuarnermi aalajangigaq qulaani allaaserineqartoq, ataatsimiinnermi tunngavigineqarluni. Ataatsimiinnermi tassani ilisimatinneqarpugut, pissutsit sulisut suliffimmi atugaat pillugit misissuineq aallatinneqarsimasoq, aammalu sulisut tamarmik suliassaasa allatorneqarsimalernissaat sulissutigineqassasoq neriorsorneqarluta.

Marts-imi kommune kujalleq ataatsimeeqatigineqarpoq, tassanilu direktion-imit Kommuneqarfik Sermersooq-mi direktionip neriorsuutaasa assinginik neriorsuisoqarluni.

Taamatuffaarik novemberi aallartisimalaartoq Qaasuitsup kommuniani direktioni ataatsimeeqatigineqarpoq, aamma taama inerneqartumik.

Amigaataalersoq Qeqqata Kommuniani direktioni 2012 aallartisimalaaleriarpat ataatsimeeqatigineqassaaq.

2012-ip ingerlanerani kommuneni isumaqatigiissutaasimasut qanoq ingerlasimanersut paasiniar-neqassapput, taamaaliornikkut suliassat unittuunnginnissaat anguniarlugu.

Sinniisunik pikkorissaanerit..

2011 ilaatigut sinniisutsinnik senerissameersunik pikkorissaavigalugu atorparput. Taama pikkorissaasarneq aningaasatigut periarfissaqartillugu, aamma sapinngisamik ukiup ataatsimeersuarfiup tulliani ingerlanneqartarpoq. Tassalu ukioq manna aamma taamaaliorpugut.

Marst 2011 sinniisut Nuummeersut Maniitsumeersorlu ataaseq maani Nuummi pikkorissartinneqarput.

Maj 2011 sinniisut kujataarmiut, tassalu Paamiuniit Nanortalik ilanngullugu Qaqortumi pikkorissartinneqarput.

November 2011 sinniisut avannaamiut, tassalu Upernavimmiit Sisimiunut Aasianni pikkorissartinneqarput.

Pikkorissaanerni taakkunani tamatigut Per Kunuk Lynge pikkorissaasorisarparput, sinniisut sinniisutut sulinissaanni, inuttut ineriartorneq aqqutigalugu piukkunnarsarlugit. Taamaaliorneq peqataasunit iluarisimaarneqarpoq, pissarsiviusutullu nalilerneqarluni.